Rusiya Federasiyası Dövlət Dumasının deputatı, Rusiya-Ermənistan “Lazarev klubu”nun koordinatoru Konstantin Zatulin qurum adından bəyanat yayaraq, Qarabağ iqtisadi rayonu ətrafında cərəyan edən proseslərdən narahatlığını bildirib.

Bəyanat məlum və darıxdırıcı tezislərdən ibarətdir: “Qarabağ erməniləri məhv olmaq təhlükəsi ilə üz-üzədir”, “Azərbaycan “Qarabağ xalqı” adlanan insanları (bu nə xalqdır belə!? - red.) azadlıq və öz müqəddəratını təyinetmə hüququndan məhrum etməyə çalışır” və s.

Bəyanat müəllifləri Ermənistanın hazırkı hakimiyyətini istər ölkənin keçmiş rəhbərlərinə, istərsə də Rusiyaya qarşı davamlı ittihamlarla müşayiət olunan milli xəyanətdə, eləcə də tarixi düşmənlərə (Türkiyə, Azərbaycan - red.) göz yummaqda ittiham edirlər.

Daha sonra bəyanatda maraqlı bir fikir yer alır: “Rusiya və Ermənistan xalqlarının taleyinə biganə olmayan müxtəlif millətlərdən və peşələrdən olan insanları bir araya toplayan “Lazarev klubu” Ermənistanda və ətrafdakı ermənilərə müraciət edərək dünya ermənilərinin xilası naminə birliyə çağırır”.

Faktyoxla Lab. “Lazarev klubu”nun nə işlə məşğul olduğunu və rəhbərinin niyə belə açıqlama verdiyini aydınlaşdırmağa çalışıb.

Amma əvvəlcə bu klubun adını haradan götürdüyünə aydınlıq gətirək. Məlum olur ki, klub Lazaryan ailəsinin adını daşıyır. Belə ki, 1747-ci ildə İrandan Rusiyaya gələn Lazar Nazaroviç Lazaryan ölkəni ermənilərlə doldurmaq üçün “uzun və əziyyətli işə” başlayır.

Ancaq əvvəlcə oğlunu imperatriça Böyük Yekaterinanın hüzuruna təqdim edir və sonradan onun saray zərgərinə çevrilir. Hətta ona rəsmi olaraq “Şərq məsələləri üzrə müşavir” adı da verilir. O, ermənilərin problemli Krımdan Rostov vilayətinin münbit torpaqlarına (indiki təsnifata görə), 1779-cu ildə Nor-Naxçıvan (Yeni Naxçıvan) şəhərinin əsası qoyulduğu yerə, gələcəkdə Naxçıvan-Don adlanacaq əraziyə köçürülməsi üçün Yekaterinanın fərman verməsinə nail olur.

Böyük maliyyə resursları Lazarevlərə çevrilən Lazaryan qardaşlarına, pula həris olan rus elitasını almağa imkan verdi. Həmvətənlərini kiçik, lakin nüfuzlu bürokratik vəzifələrə yerləşdirdilər. Hər yeni müharibə, hər bir sülh müqaviləsi ermənilərin Rusiyaya köçürülməsini əhatə etməyə başladı. Bütün bunlar yalnız qismən dövlət tərəfindən maliyyələşdirilirdi, qalan payı Lazarevlər özləri ödəyirdilər.

Böyük Yekaterinanın və onun müşaviri olan oğul Lazarevin ölümündən sonra İran və Türkiyə  ermənilərinin köçürülməsinə Lazarevlərin nəvələri rəhbərlik edirdi. Ümumilikdə 1 milyona yaxın erməni köçürüldü (mənbə) ki, bu da yüz il ərzində (1828-ci ildən 1928-ci ilə qədər) onların sayının təxminən 100 dəfə artırmağa imkan verdi. 50.000-dən 3.000.000-a qədər (1922-ci ilin siyahıyaalınması). XVIII əsrdə lazarların qoyduğu ideyalar bütün rus ermənilərinin hərəkətverici qüvvəsinə çevrildi - hakimiyyətə gəlmək və ən yaxşı əraziləri məskunlaşdırmaq, yerli əhalini sıxışdırmaq və öz qaydalarını tətbiq etmək. Bu qayda, hətta SSRİ-də dövlət səviyyəsində də işləyirdi. Xalqlar deportasiya olundu, onların yerində ermənilər məskunlaşdı.

Bu gün məhz bu ideyaların mərkəzində deputat Zatulinin təşəbbüsü ilə yaradılmış “Lazarev Klubu” dayanır. O, erməni ideyasını təbliğ edən rusların bütün rəngini ehtiva edir - Rusiyadakı ən zəngin ermənilər və bir çox məşhur ruslar kimi.

Beləliklə, Lazaryan ailəsi bütün dünya ermənilərinin Rusiya imperiyasında məskunlaşmasının təşəbbüskarı və baş sponsoru oldu (istinad).

Bəs "Lazarev klubu"nun məqsədi nədir?

Klubun saytında qeyd olunur ki, “Lazarev klubu” Rusiya və Ermənistan cəmiyyətləri arasında görüşlər və fikir mübadiləsi üçün qeyri-rəsmi, azad və daimi platformadır.

“Lazarev Klubu Rusiya və Ermənistanda görüşlər, dəyirmi masalar və ictimai dinləmələr təşkil etməklə öz işini açıq şəkildə aparacaq. Ümid edirik ki, Klubda keçirilən görüşlər ölkələrimizin xalqlarının mənafeyi naminə, bütün Böyük Qafqaz regionunda təhlükəsizlik və sabitliyin təmin edilməsi maraqları naminə qarşılıqlı etimadın və qarşılıqlı müttəfiqlik fəaliyyətinin gücləndirilməsi istiqamətində gələcək konstruktiv iş üçün müsbət əhval-ruhiyyənin formalaşmasına kömək edəcək”, - “ Lazarev klubu”nun yaradılması ilə bağlı müraciətdə deyilir.

Klubun ilk iclası 30 noyabr -1 dekabr 2018-ci il tarixlərində İrəvanda keçirilib. Həmin vaxt da Klubun Şurası seçilib.

Bu Şuranın əsas fiqurlarından bəzilərini təqdim edirik:

- Zatulin Konstantin Fyodoroviç - “Lazarev Klubu”nun yaradılması üzrə Təşkilat Komitəsinin sədri, Rusiya Federasiyası Federal Məclisinin və Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini, MDB ölkələri İnstitutunun rəhbəri ( Rusiya).

- Ambartsumyan Sergey Aleksandroviç - “Monarx” konserninin baş direktoru (Rusiya).

- Balayan Zori Qaykoviç - Yazıçı, ictimai xadim (Ermənistan).

- Karapetyan Samvel Sarkisoviç – “Taşir” şirkətlər qrupunun prezidenti və təsisçisi (Rusiya).

- Babayan Roman Georgiyeviç - Jurnalist, teleaparıcı, "Danışır Moskva" radiostansiyasının baş redaktoru,  7-ci çağırış Moskva Şəhər Dumasının deputatı (Rusiya).

Bu Klubda Zori Balayanın olması çox şeydən xəbər verir. Klubun demək olar ki, bütün Şurası ermənilərdən və ermənipərəst ruslardan ibarətdir. “Lazarev Klubu”nun Şurası haqqında səhifəyə baxsanız, o zaman Rusiya televiziyasının tanınmış simalarını - Tretyakov və Şahnazarovu da tapa bilərsiniz.

Bu Klub yaradılarkən “Rosoboroneksport” və “Qazpromeksport” dövlət korporasiyalarından 150 milyon rubl məbləğində əhəmiyyətli maliyyə vəsaiti alıb. Klub, həmçinin Samvel Karapetyan (“Taşir” qrupu), Sergey Ambartsumyan (“Monarx” konserni), Kamo Avaqumyan (“Avilon” şirkəti) və başqaları kimi erməni əsilli rus iş adamlarının maddi dəstəyindən də daim istifadə edir.  Zatulinin rəhbərlik etdiyi MDB ölkələri İnstitutu da bura daxildir”.

Klubun maliyyə hesabatları ilə tanış olmaq mümkün deyil, lakin İnstitutun maliyyə hesabatlarında “Qazpromeksport” və “Rosoboroneksport”la 150 milyondan artıq dövlət müqaviləsi var. Belə ki, Rusiyanın dövlət maraqlarının təşviqi və müdafiəsi üçün ayrılan vəsaitlər Zatulinin təşkilatının hesablarına oturur.

Diaspor və İnteqrasiya İnstitutuna (MDB ölkələri İnstitutu) gəlincə, institutun təsisçisi və direktoru rusiyalı siyasətçi K.F.Zatulindirsə, Elmi Şuranın sədri A.M.Miqranyandır. Burada da Zatulinin ermənisi var. Bu institutun nə etdiyini öyrənməyə belə ehtiyac yoxdur, sadəcə onun informasiya resursuna daxil olun və orada analitikanı oxuyun, ancaq ölkələrlə açılan qutuya baxmaq daha asandır. Dövlətlər arasında MDB ərazisindəki bütün separatçı birləşmələr göstərilir. Və bu təşkilat özünü “Rusiya maraqlarının elmi dəstəyi” elan edib.

Zatulin Dövlət Dumasının MDB İşləri və Həmvətənlərlə Əlaqələr Komitəsinin sədr müavini olmaqla, əslində Ermənistanın rəsmi ruporu və onun Rusiya Federasiyası Dövlət Duması Komitəsindəki nümayəndəsidir.

Rusiyanın özündə Zatulinlə bağlı fikirlər belədir:

“Rusiya Dövlət Dumasında belə bir deputat var - Zatulin - yaxın xaricdə yaxşı tanınan şəxs.

Əvvəla, o, milli barışmazlığın təbliğatçısı kimi Dövlət Dumasının MDB İşləri və Həmvətənlərlə Əlaqələr Komitəsindədir. Üstəlik, bu yoldaş Diaspora və İnteqrasiya İnstitutuna (MDB ölkələri institutu) da rəhbərlik edir.

Onu xatırlatmaq kifayətdir ki, o, hələ 2000-ci illərdə, “Maydan” qoxusunun olmadığı bir vaxtda Ukrayna və Rusiya xalqlarının parçalanmasına töhfə verənlərdən biri idi.

Sonradan ona dəfələrlə Ukraynaya girişi qadağan edilib və 2008-ci ilin iyulunda SBU ona qarşı “Kütləvi iğtişaşlar” maddəsi ilə cinayət işi açıb. O, Kiyev Rus Kilsəsinin  1020-ci ildönümünün qeyd edilməsi zamanı iğtişaşlar törətmək istəyib”.

Bu da Zatulinin Belarus prezidenti Lukaşenko haqqında dediyi sözlər:

“O, müftəxor, praktiki olaraq Rusiya-Belarus münasibətlərinin parazitinə, şantajçıya çevrildi. Və hətta bu durumda da rusları həbs edərək təxribat törətdi” (istinad).

Keçmiş SSRİ-nin demək olar ki, bütün ölkələrində Zatulin “persona non-qrata” sayılır. Bəziləri rəsmi, bəziləri qeyri-rəsmi.

Bəs ermənilərin özləri Zatulin haqqında nə düşünürlər?

Belə ki, Moskvada fəaliyyət göstərən “Dialoq” təşkilatının sədri Yuri Navoyan Ermənistan hakimiyyətinə açıq məktub göndərib və Konstantin Zatulin tərəfindən yaradılan “Lazarev klubu”nun gələcək hədəflərindən narahatlığını bildirib. Navoyan məktubunda xüsusilə baş nazir Nikol Paşinyana, prezident Armen Sarkisyana, Təhlükəsizlik Şurasının katibi Armen Qriqoryana və Milli Assambleyanın spikeri Ararat Mirzoyana müraciət edib. “Siz bilirsiniz ki, Zatulin Ermənistanda devrilmiş qüvvələrin birləşməsinə və onların qisas almasına kömək etmək istəyir? Navoyan açıq şəkildə vurğulayır ki, klub köçəryanyönümlüdür.

Politoloq Qaqik Ambaryanın müsahibələrinin birində verdiyi sual da maraqlıdır.

Ambaryanın sözlərinə görə, indi problem belədir: “Ermənistan hakimiyyəti (Paşinyanın komandası-red.) bu klubun fəaliyyətini onlara sərfəli şəkildə idarə edə bilərmi? Mən buna çox şübhə edirəm”. Yəni bu kluba keçmiş hakimiyyət rəhbərlik edir.

2019-cu il dekabrın 13-də İrəvanda “Rusiya və Ermənistan mediası – səmimi söhbət” mövzusunda Rusiya-Ermənistan “Lazarev klubu”nun üçüncü iclası keçirilib.

 Zatulinin çıxışından sitat: "Diqqətinizə çatdırmaq istəyirəm ki, bu görüşə hazırlaşmaqda bizə səmərəli dəstək göstərilib. Biz Rusiyada qeyri-kommersiya və ictimai təşkilatlar üçün müsabiqələr keçirən Rusiya Federasiyası Prezidentinin Administrasiyasına müraciət etdik. İlk dəfədir ki,  "Lazarev Klubu"nun iclası Rusiya Federasiyası Prezidentinin ayırdığı qrant hesabına dəstəklənir.

 Güvən və dəstəyə görə Rusiya Federasiyası Prezidentinin Administrasiyasına təşəkkür etmək istərdim. Bizə Klubun ənənəvi dostları, hörmətli sponsorlarımız da (!!!-red.) dəstək oldular. Bütün dostlarımıza və dəstək verənlərə öz təşəkkürümü bildirirəm. Bu dəstək sayəsində biz bu gün bir araya gəldik”.

Bir sözlə, rusiyalı deputat Zatulin ermənilərin maraqlarına xidmət edən sıradan bir əlaltıdır.