Təbliğatçı, siyasi məsləhətçi, media eksperti və "Çistota ponimaniya" “YouTube” kanalının müəllifi. Rusiya və Ukrayna (Lvovda qeydiyyatda olub) vətəndaşlığı olsa da, hazırda Rusiyada yaşayır, Avrasiya/İttifaq inteqrasiyasına həsr olunmuş analitik resurs olan "SONAR-2050 (İttifaq Narrativi 2050)" layihəsinin baş redaktorudur.
Aleksey Çadayevlə birlikdə "Çistota ponimaniya" (Anlayışın təmizliyi) proqramını aparır (moderatoru İvan Knyazevdir).
20 aprel 1979-cu ildə Novosibirsk şəhərində, hərbi konstruktor və dəmir yolu mühəndisi ailəsində anadan olub. Uşaqlıq illəri SSRİ ərazisində daimi miqrasiya içində keçib. Orta təhsilini Ukraynada almış, 2001-ci ildə Lvov Dövlət Universitetinin filologiya fakültəsinin rus bölməsini bitirmişdir.
Uralov özünü açıq şəkildə "rəngli inqilablarla mübarizə" üzrə mütəxəssis, Rusiya, Qazaxıstan və Belarusun Avrasiya inteqrasiyasının, eləcə də "rus dünyası" ideyalarının tərəfdarı adlandırır. O, dövlət mülkiyyətinin və "sosial ədalətli cəmiyyətin" lehinə çıxış edərək, "kommunizmin bəşəriyyətin gələcəyinin keçmişi olmadığını" bəyan etmişdir. 2014-cü ildə "Krım yazını" dəstəkləmiş, Odessa Həmkarlar İttifaqları Evindəki yanğın zamanı zərər çəkmiş fəalların təxliyəsini təşkil etmiş, bundan sonra Donetskdə yaşayaraq tanınmamış “Donbas respublikalarını" müdafiə etmişdir.
Genişmiqyaslı müharibə başladıqdan sonra Uralov anti-Ukrayna xarakterli materiallar yaymış, işğal olunmuş ərazilərdə psevdoreferendumları dəstəkləmiş və onların Rusiyaya “inteqrasiya” olunmasının tərəfdarı kimi çıxış etmişdir.
Uralov uzun müddət Ukrayna siyasəti ilə əlaqəli olub. O, 2009-cu ildə Arseni Yatsenyukun qərargahında, 2012-ci ildə isə İqor Markovun politoloqu kimi çalışıb. 2011-ci ildə Ukraynada “Regional Tədqiqatlar və Strategiyalar Mərkəzi” İctimai Birliyini qeydiyyatdan keçirib.
Xatırladaq ki, daha əvvəl “Qlavkom” nəşri Rusiya prezidentinin sabiq köməkçisi Vladislav Surkovla bağlı yazışmalar olan təxmini “Surkovliks” sənədləri haqqında yazmışdı. Materiallarda Semyon Uralov 2014-cü ildə Ukrayna informasiya məkanında rusiyapərəst mövqelərinin təbliği üçün Kreml tərəfindən cəlb olunması təklif edilən şəxslər arasında yer alıb. O, “orta səmərəliliyə malik şəxslər” kateqoriyasına aid edilib.
2 may 2014-cü ildə Odessada Həmkarlar İttifaqı Evində baş verən qanlı hadisələrdən sonra o, separatçı meylli aktivistlərlə gizli əlaqələrdə və proseslərin Rusiya xeyrinə manipulyasiya edilməsində rol oynayıb. Daha sonra (2015-ci ildən) isə qondarma "DNR" (Donetsk) ərazisinə keçərək separatçılara ideoloji dəstək verib.
Uralov özünü adi bir media eksperti deyil, məhz "koqnitiv müharibə" (humanitar texnologiyalar vasitəsilə kütlələrin beynini yuma və manipulyasiya etmə) mütəxəssisi kimi təqdim edir. O, "SONAR-2050" layihəsi çərçivəsində postsovet ölkələrində “Rusiya imperiyasının” yumşaq gücünü bərpa etmək üçün cəmiyyətlərin daxildən parçalanması metodologiyalarını hazırlayır. Onun fikirləri rəsmi Rusiya mediasında belə bəzən "həddindən artıq radikal və zərərli şovinizm" kimi qiymətləndirilir. “SONAR-2050” Rusiya-Belarus inteqrasiyasını açıq şəkildə təbliğ edən analitik-media layihəsidir.
Uralov ideoloji olaraq digər müstəqil dövlətlərin suveren hüquqlarını tamamilə rədd edir. Uralov bu mövqeyini özünün Azərbaycana, Baltikyanı ölkələrə və Ukraynaya qarşı olan "dünyagörüşü qeyri-uyğunluğu" ilə əsaslandırır və bu dövlətlərin müstəqilliyini qəbul etmir.
S.Uralov təbliğat fəaliyyətini müəllifi olduğu "kognitiv müharibə" konsepsiyası ətrafında qurub. Bu nəzəriyyəyə görə, Qərb, cəmiyyətin (xüsusilə Ukrayna cəmiyyətinin) şüuru ilə məqsədyönlü şəkildə manipulyasiya edərək, struktur təfəkkür və tarixi yaddaş qabiliyyətini məhv edir.
Onun müəllifi olduğu və ya rəhbərlik etdiyi media layihələrində səsləndirilən fikirlər, həmçinin müxtəlif internet şouları və podkastlarda (məsələn, Dmitri Puçkovun “Goblin” layihəsində) çıxışları tez-tez qütbləşdirici, sərt anti-Qərb və radikal siyasi çağırışlarla yadda qalıb. Bu səbəbdən bir çox Qərb və Ukrayna mənbələrində o, Rusiya təbliğat maşınının təmsilçisi və təsir agenti kimi qələmə verilir.
Uralovun business-gazeta.ru-ya verdiyi müsahibəsində “koqnitiv üsul”u belə tərif edir: “Koqnitiv üsulda – həqiqət emosiya ilə doldurulduqdan sonra ona bir az yalan əlavə edilir və bu tədricən insanın zehninə yeridilir”.
Yəni o, koqnitiv müharibədə “həqiqət və ya yalanın əhəmiyyəti yoxdur” – vacib olan emosional yükdür, insanı həqiqətlə də “ağlını itirməyə” məcbur etmək olar. Bu, “medianın həqiqət üçün yox, manipulyasiya aləti kimi istifadə” iddiasının öz dilindən təsdiqidir.
Müsahibədə ən diqqət çəkən məqam Rusiyanın postsovet rusdilli məkanda uduzduğunu onun etiraf etməsidir.
O, qonşu ölkələrin ( Qazaxıstan/Qırğızıstan konteksti) siyasi fəal təbəqəsinin Rusiya siqnalına loyal olmadığını açıq deyir və Belarusu “təmizlənmiş sahə” kimi qeyd edir.
Digər məsələ isə onun sadəcə müdafiə yox, hücum infrastrukturu təklif etməsidir:
“Bir böyük «Solovyov» tipli yayıcı yox, “hər min izləyiciyə min yoluxdurucu” fikrini səsləndirir, Ukraynada auditoriyanı parçalamaq üçün "bizimlər, bizdən olmayanlar, tərəddüd edənlər… tam məhv edilmiş düşmənlər və qorxaq düşmənlər, potensial xainlər. Bütün bu auditoriyalara fərqli siqnallar göndərmək lazımdır" («наши, не наши, колеблющиеся… враги конченые и враги трусливые, потенциальные предатели. Всем этим аудиториям надо посылать разные сигналы») təklif edir. Başqa sözlə desək, hər bir təbəqəyə uyğun ayrıca mesajlar verilməlidir.
2000-ci illərin sonu və 2010-cu illərin əvvəllərində (əsasən Odessa) aktiv siyasi texnoloq kimi çalışıb.
Ukrayna mənbələrində onun müxtəlif seçki qərargahlarında fəaliyyəti (o cümlədən "Regionlar Partiyası", İqor Markovla əlaqəli kampaniyalarda və digər layihələrdə iştirakı) qeyd olunur. Ukraynanın "Mirotvorets" bazasına daxil edilib.
2026-cı ilin aprel ayında İvano-Frankovsk şəhər məhkəməsi onu anti-Ukrayna xarakterli nəşrlərinə və Rusiya Federasiyasının hərbi təcavüzünün tərənnüm edilməsinə görə qiyabi olaraq 10 il müddətinə azadlıqdan məhrum edib.
Rusiya-Ukrayna-Almaniya "Der Spiegel Profil" jurnalının baş redaktoru (2007–2008), "Odnako. Ukraina" (2008–2012) və "Odnako. Yevrasiya" (2008–2016) xüsusi layihələrinin rəhbəri olmuşdur.
2014-cü ildən sonra Ukraynada baş verən hadisələri (Maydan hərəkatını) kəskin şəkildə pisləyən və tənqid edən Rusiya yönümlü layihələrdə (“Odnako”, müxtəlif analitik portallar) mərkəzi simalardan biri olub.
2014-cü ildə Uralov Bokovun dəstəyi ilə ortaqları Vanya Lizanla (“Rusiya SONAR 2050” layihəsinin redaktoru) birlikdə Donetskə köçürülür, 2016-cı ildə Rusiyadakı regional seçkilərdə (Orenburqda) siyasi strateq kimi fəal iştirak edir, Kommunist Partiyasının fəal təşviqatçısı olur.
Ukrayna mənbələri onu “qara siyasi texnoloq”, “putinist”, “propagandist” adlandırır. Bəzi materiallarda 2014-cü il “Surkovleaks” sənədlərində onun Ukraynada rusiyayönümlü mövqelərini irəli sürmək üçün cəlb edilməsi təklif olunan şəxslər arasında adı keçir.
Uralovun “kommunizm bəşəriyyətin keçmişi deyil, gələcəyidir” şüarı da məhz bu xəstə ideologiyadan qaynaqlanır.
2022-ci ildə Semyon Uralov tez-tez siyasi verilişlərin qonağı olur və Vladimir Solovyovun verilişində çıxış edir. “Super. Uralov” “YouTube” layihəsində gənclərə rus millətçiliyini aşılayan məsləhətlər verir.
Son illərdə əsas işi Ukraynaya qarşı “qara propaqanda” aparmaq, Ukrayna xalqının haqq mübarizəsini ləkələmək, bu ölkə ilə normal münasibətlər quran dövlətlərə şər-böhtan atmaqdan ibarətdir.
Onun Ukraynadan sonrakı dövrdə Qazaxıstan və Moldovanın rus ilhaqına dair çağırışları da diqqət çəkir.
Uralov dəfələrlə keçmiş sovet respublikalarının suverenliyini şübhə altına alan fikirlər səsləndirib, “Rusiya yurisdiksiyası çərçivəsində 1991-ci ildən əvvəl Sovet İttifaqı ərazisinə aid olmuş istənilən şəxs məsuliyyət daşıyır... Onlar Sovet İttifaqı vətəndaşıdırlar... Biz varislərik, ona görə də, hər kəsi mühakimə etmək hüququmuz var” deməklə başqa dövlətlərin suverenliyini təhdid altına alır.
Məhkəmə işi
İvano-Frankovsk şəhər məhkəməsi Ukrayna vətəndaşlığı olan rusiyalı "politoloq" Semyon Uralovu qiyabi olaraq 10 il müddətinə məhkum edib.
Sındırılmış şifrələr hər şeyi bəlli etdi
Uralov 2009-cu ildə Vladimir Petrov (Lumpen) ilə birlikdə Arseni Yatsenyukun prezident kampaniyasında işləyib. Petrov Yatsenyukun “LiveJournal”-ını aparırdı. 2009-cu ildə namizədin adından söyüşlü şərh yazıb “unudaq çıxış etməyi” skandalı da məhz ona bağlıdır.
2010-cu ildə Yatsenyuk qərargahının internet qrupunda işləmiş anonim əməkdaş “Досье”-yə verdiyi müsahibədə Petrovu qrup rəhbəri, Uralovu isə Kiyev kampaniyası ilə bağlı şəxs kimi göstərir və ödənişlərin gecikməsindən danışır.
2012-ci ilin sentyabr ayında "Ukraynskaya pravda" nəşri İqor Markov və Semyon Uralovun elektron poçt yazışmalarını dərc etmişdir. Həmin sənədlərə əsasən, Uralov 2009-cu ildə prezidentliyə namizəd Arseni Yatsenyukun seçki qərargahında fəaliyyət göstərib. Onun həmin dövrdəki həmkarlarından biri hazırda Təhlükəsizlik Xidməti tərəfindən dövlət xəyanətində şübhəli bilinərək barəsində cinayət işi başlanmış "İslandiya" “YouTube” layihəsinin aparıcısı Vladimir Petrov olub. Yazışmalardan həmçinin məlum olur ki, Uralov 2012-ci ildə "Regionlar Partiyası"ndan Ali Radaya deputatlığa namizəd olan İqor Markovun (hazırda o da dövlət xəyanətində şübhəli bilinir) komandasında siyasi texnoloq kimi çalışıb.
“YouControl” platformasının məlumatına görə, Semyon Uralov 2011-ci ildə Ukraynada "Regional Tədqiqatlar və Strategiyalar Mərkəzi" ictimai təşkilatını qeydiyyatdan keçirib. 24 aprel 2026-cı il tarixinə olan vəziyyətə görə, bu təşkilatın fəaliyyətinə xitam verilməyib, Uralov isə onun rəhbəri və imza səlahiyyətli şəxsi kimi göstərilir. Məlumatda həmçinin onun Lvov şəhərində qeydiyyatda olduğu bildirilir.
Uralov 2012-ci ildə Odessada İqor Markovun parlament seçki kampaniyasında (133 saylı dairə) əsas siyasi texnoloqu olub. Markov o dairədə Aleksey Qonçarenkoya (o vaxt “Partiya regionov” namizədi) qalib gəlib. 2012-ci il Odessadakı seçki kampaniyası böyük qalmaqalla yadda qalıb. Uralovun e-poçtu və sosial hesabları sındırılıb, məzmunu “Uralovleaks” adlı saytda yayımlanıb. Sızdırılmış yazışmalarda rəqib Aleksey Qonçarenkoya qarşı çirkli texnologiyalar müzakirə olunub: saxta “Facebook” hesabları, kompromat, DDoS-hücumlar, jurnalistə qarşı təxribat (saxta döyülmə, “hamiləlik və düşüklük” ssenarisi və s.).
Bu materiallar Ukrayna mediasında (Ukrayinska Pravda və digərləri) geniş işıqlandırılıb və “bədnam siyasi texnologiyalar” kimi tənqid olunub.
2012-ci il “Uralovleaks” sızdırmasının detalları
Bu hadisə 2012-ci il sentyabrın əvvəlində Odessada parlament seçkiləri (133 saylı dairə) zamanı baş verib. Semyon Uralov, o vaxt “Regionlar Partiyası”nın namizədi Aleksey Qonçarenkonun rəqibi İqor Markovun (Partiya “Rodina” lideri) əsas siyasi texnoloqu idi.
Naməlum hakerlər Uralovun e-poçtunu və “Facebook” hesabını qıraraq (2 sentyabr 2012) bir sıra yazışmaları xüsusi yaradılmış uralovleaks.su saytında yayımlanmağa başlayır. Saytda yüzlərlə fayl, ekran görüntüləri və yazışmalar dərc olunur. Sızdırma “Ukrayinska Pravda”, “Dumskaya” və digər media orqanlarında geniş işıqlandırılır və seçki kampaniyasında kompromat müharibəsinin zirvəsi hesab olunur.
Sızdırılan materialların əsas məzmunu
Yazışmalarda Uralovun komandası (o cümlədən Volodimir Petrov ilə) rəqibə qarşı “çirkli texnologiyalar” müzakirə edir. Müzakirələrdə Qonçarenko adından saxta “Facebook” səhifəsi yaratmaq, “axmaq” və təhdidedici mesajlar göndərmək, jurnalist Alina Oljiç-ə (və ya “Alyonka”) kobud mesajlar yazmaq, Qonçarenkonu jurnalistlərə qarşı zorakılıqda ittiham etmək və nüfuzunu sarsıtmaq məqsədilə onu “döydürmək” (bir neçə göyərmə), sonra isə onun “hamilə olduğunu və Qonçarenkonun təzyiqi nəticəsində abort etdiyini” iddia etməyi planlaşdırmaq, DDoS-hücumlar, avtodialer (avtomatik zənglər), pullu şərhçilər (1 dollar/şərh), spam və s. təklif olunur.
Ukrayna mediası (Dumskaya və s.) yazırdı ki, arxivdə DDoS və “avtozəng” qiymət cədvəlləri, sifarişli məqalələr, fotomontaj, spam, rəqib saytlarına hücum və Qonçarenkoya qarşı təxribat planları var. Mətnlərdə Markovun Viktor Medvedçukla görüşü və Radada “qrup yığmaq” da keçirdi.
Qərargahda guya Qonçarenkonun adından spam-hücum həyata keçirilməsi texnologiyası işlənib hazırlanır:
DDoS-hücumlar və "avtozəng" (kütləvi) xidmətlərinin qiymətləri:
Bu sənədlər və yazışmalar Semyon Uralovun və onun ətrafının sifarişi ilə müxtəlif media nümayəndələrini, o cümlədən jurnalist Oljiçin adından istifadə olunmaqla həyata keçirilən informasiya təxribatlarının, manipulyasiyaların və qara PR kampaniyalarının təşkilini üzə çıxarır. Həmin materiallarda sifarişli xarakter daşıyan materialların yayılması, saxta kampaniyaların koordinasiyası və media vasitəsilə ictimai rəyin çaşdırılmasına dair detallar əksini tapıb.
Sızdırılmış fayllara əsasən, Markovun qərargahının informasiya siyasəti nəzarətdə olan KİV-lər vasitəsilə rəqib barədə yalan məlumatların yayılmasına əsaslanır. Bu epizodda "iki nəfər axmaq tapmaq" təklif olunur ki, onlar kamera qarşısında Qonçarenkonun özlərini saxta təşviqat materialları paylamağa məcbur etdiyini desinlər.
Aşağıdakı faylda qərargahın namizədin özünü necə qiymətləndirdiyindən və "nənələrin" (yaşlı seçiciləri belə adlandırır – red.) kiçik ərzaq payları (propayklar) müqabilində asanlıqla satın alınmasından bəhs edilir.
Saytda yerləşdirilmiş fayllar arasında Uralovun 133-cü dairədən namizəd olmuş müstəqil namizəd Vadim Qorç ilə guya Markovun dəstəyi müqabilində pul almağa çalışdığı yazışmaları da yer alıb.
"Uralovliks" saytındakı ən maraqlı epizodlardan biri onun Viktor Medvedçukun uzunmüddətli silahdaşı Vladimir Qranovski ilə siyasi dəstək barədə guya aparıldığı yazışmalardır.
Qeyd edək ki, o dövrün Ukrayna polittexnologiyasında media yerləşdirməsi və “qara” əməliyyatların çoxu nağd, bəyan edilməmiş pulla gedirdi. Sızıntıda qiymət cədvəlləri və sifarişli işlər yer alır.
Həmçinin yazışmalarda Viktor Medvedçukun adı keçir və “rus qanadı” yaratmaq planları müzakirə olunur (bəzi media orqanlarının şərhinə görə).
Bir faktı da qeyd edək ki, “Faktyoxla” İqor Markovla bağlı “Kyiv Post”un müəmmalı fəaliyyəti, azad söz bəhanəsi və rəhbərləri haqda agentura şübhələri” məqaləsində məlumat verib. Həmin məqalədə Kyiv Post”-un sahibi Adnan Kivanla (Suriya mənşəli Ukrayna vətəndaşı, “KADORR Group”-un təsisçisi) Markovun əlaqələrinə toxunulmuşdu.
Qeyd edilirdi ki, 2017-ci ildə Ukrayna Təhlükəsizlik Xidməti (SBU), Rusiya tərəfdarı kimi tanınan və Odessa Şəhər Şurasının keçmiş qaçaq deputatı olan İqor Markov vasitəsilə qondarma "DXR/LXR" separatçı yaraqlılarını maliyyələşdirmə şübhəsi ilə “KADORR Group”un ofislərində irimiqyaslı axtarışlar həyata keçirib.
SBU-nun ilkin iddialarına görə, şirkət satılan daşınmaz əmlakdan əldə olunan nağd pulların bir hissəsini Markov vasitəsilə qanunsuz silahlı birləşmələrə yönəldirmiş. Əməliyyat zamanı 20 milyondan çox nağd pul aşkarlanmışdı. "Ukrinform"-un rəsmi bəyanatında qeyd edildiyi kimi, Markov terrorizmin maliyyələşdirilməsi (Ukrayna CM-nin 258-5 maddəsi) ittihamı ilə beynəlxalq axtarışa verilmişdi.
Yeri gəlmişkən, qeyd edək ki, Uralovun Odessa merinin oğlu, Regionlar Partiyasından namizəd Aleksey Qonçarenko arasında kompromatları onun xislətini tam ortaya qoydu. Odessa merinin o dövrkü mətbuat katibi Anna Perevalova Uralovu “böyük pulların acgözü” adlandırırdı.
Uralov öz rəqəmsal platformalarındakı layihələri, o cümlədən “koqnitiv müharibələr” mövzusundakı araşdırmalarını birbaşa olaraq Rusiya daxilindəki radikal-millətçi izləyici kütləsinin ianələri hesabına maliyyələşdirdiyini bəyan edir. O, rəsmi “Telegram” kanalında maliyyə toplamaq üçün bu rus platformalarından istifadə edir:
- ru (su2050): İzləyicilərin pullu abunəlik sistemidir.
- to (su2050): Rusiya daxilində fəaliyyət göstərən, bloggerlərə birbaşa maliyyə dəstəyi göndərmək üçün istifadə olunan ən populyar platformadır.
Semyon Uralovun media layihələri Rusiya dövlətinin "yumşaq güc" qrantları, Kreml kuluarlarına bağlı nüfuzlu dövlət məmurlarının inzibati-maliyyə himayəsi və Rusiya daxili millətçi kütləsinin kraudfandinq dəstəyi ilə maliyyələşir.
Belarus müxalifəti və bir sıra müstəqil analitiklər belə layihələri (SONAR-2050 də daxil) “yumşaq güc” aləti hesab edirlər: suverenliyin faktiki olaraq İttifaq Dövləti çərçivəsində əriməsi, informasiya məkanının sinxronlaşdırılması və “rus dünyası” narrativinin gücləndirilməsi.
Oxşar tənqid ümumiyyətlə Rusiya tərəfindən maliyyələşdirilən və ya dəstəklənən media, fondlar və “həmvətənlər” şəbəkələrinə də yönəlir.
Mediada onun təşkilatının maliyyələşdirilməsinin Rusiya dövlət büdcəsi (qrantlar) və qeyri-şəffaf fondlar tərəfindən həyata keçirildiyi iddia edilir. Layihənin hüquqi forması Rusiya Federasiyasında (Moskva vilayəti, Zveniqorod) qeydiyyatdan keçmiş tədqiqat mərkəzi kimi görünür.
Mərkəzi Avropada fəaliyyət göstərən və postsovet məkanındakı hibrid təhdidləri araşdıran ISANS (International Strategic Action Network for Security) beynəlxalq analitik şəbəkəsi Belarus/Rusiya təbliğatını araşdırır və bu istiqamətdə fəaliyyət barədə geniş hesabatlar dərc edir.
Semyon Uralovun fəaliyyətini və təqdim olunan sənədləri təhlil etdikdə aydın olur ki, o, sadəcə media eksperti və ya analitik deyil, postsovet məkanında Rusiya xüsusi xidmət orqanlarının maraqlarına xidmət edən, hibrid hücumlar və informasiya manipulyasiyaları üzrə ixtisaslaşmış şəxsdir.
Təqdim olunan materiallar və məhkəmə qərarları onun fəaliyyətinin əsas istiqamətlərini və xarakterini açıq şəkildə ortaya qoyur:
- Uralov uzun illər ərzində müxtəlif media layihələri ("SONAR-2050", "Odnako" və s.) vasitəsilə postsovet ölkələrinin suverenliyini şübhə altına alan, Rusiya mərkəzli imperialist inteqrasiyanı və kognitiv müharibə metodlarını təbliğ etmişdir.
- Onun 2012-ci ildə Odessada İqor Markovun seçki qərargahındakı fəaliyyəti, həmçinin sındırılmış yazışmaları (Uralovleaks) rəqiblərə qarşı DDoS-hücumlar, saxta kampaniyalar, bot şəbəkələri və psixoloji təxribat kimi qeyri-qanuni üsullardan aktiv şəkildə istifadə etdiyini sübut edir.
- Ukrayna dövlətçiliyinə qarşı yönəlmiş çağırışları, separatçı rejimləri dəstəkləməsi və Rusiya təcavüzünə bəraət qazandırması nəticəsində o, İvano-Frankovsk şəhər məhkəməsi tərəfindən qiyabi olaraq 10 il azadlıqdan məhrum edilmiş və beynəlxalq hüquqi müstəvidə separatizm və dövlətə xəyanət xətti ilə əlaqələndirilən fiqur kimi tanınmışdır.
Bütün bu faktlar Semyon Uralovun fəaliyyətinin dağıdıcı xarakter daşıdığını, informasiyanı həqiqət mənbəyi kimi deyil, cəmiyyətləri daxildən parçalamaq və manipulyasiya etmək üçün hərbi-siyasi alət kimi istifadə etdiyini birmənalı şəkildə təsdiqləyir.
P.S. 2020-ci il mayında “Medium”-da gedən anonim bir yazıda onun Universitetdə oxuduğu illərdə Ukrayna Təhlükəsizlik Xidməti (SBU) tərəfindən əməkdaşlığa cəlb edildiyi, Ukraynadakı rusdilli həmvətənlər hərəkatına sızmaq üçün istifadə olunan agent olduğu qeyd edilib.
